關心妍回鄉開騷爆滿

關心妍在家鄉佛山南海開唱

關心妍與團隊及歌迷大合影

關心妍老公也到場支持

Jade女兒楊榮心表演打鼓

愛女化身鼓手登台

關心妍回鄉開騷爆滿

關心妍(Jade)日前“衣錦還鄉”，在家鄉佛山南海舉行《聽2026演唱會》，吸引近五千樂迷買飛支持，全場爆滿。女兒楊榮心做“嘉賓”後台表現雀躍，除帶領祈禱外，更模仿媽媽“化妝Set頭”，甚有星二代味道。

演唱會開始時，關心妍一口氣唱出多首金曲，更用南海話“自家人”與“鄉里”打招呼！重返“主場”開個唱，Jade一共準備五套服飾，除大唱金曲外，場外亦有慈善攤位為弱勢社群募捐，非常有善心：“其實我都成日返嚟（佛山），真係好感謝家鄉庇佑，可以每年都喺度開演唱會，真係仲密過香港開騷。”

關心妍表示今次巡迴個唱的主題由二○二五年開始，一直希望將個唱帶回香港做終點站：“其實上次紅館二十周年開始，已經差不多五年時間，亦就快出道廿五周年，忽然間嚟到廿五周年，一直都希望最後站係返香港，我哋都睇吓紅館個期批唔批，希望可以返去紅館，有機會可以喺紅館做我廿五周年香港站。”

當晚演唱會由女兒楊榮心做“嘉賓”，不過今次拒絕表演側手翻，改為打鼓與媽媽合奏《負擔不起》，令觀眾非常有新鮮感：“因為我好想畀歌迷見吓心心，唔經唔覺咁大個女，我問佢紅館試過打翻筋斗、合唱、清唱，我覺得佢又長大咗，咁啱佢開始學打鼓，我叫佢練吓先，練到差唔多就幫我打，佢真係苦練半年！頭先台上我都唔敢望佢，忍住唔好打攪佢，佢好淡定但我就緊張到背脊出汗，依家佢表演完我鬆一口氣！”Jade笑指未知女兒還有甚麼“秘技”，估計跳舞成下一站的表演項目。囡囡表演後到台邊為媽媽拍手打氣，更不時和唱非常投入。

心心表示現學習單簧管，盼有機會在舞台上展示“音樂天賦”：“喺屋企媽咪音樂最叻，跟住就係我，爹哋係最渣！有時我喺屋企都會打鼓，媽咪負責唱歌，爹哋會做和音，不過係唱唔啱嘅和音。”完騷後大會安排“地道”大牌檔慶功，關心妍毫不介意，還貼地滿場飛敬酒，她笑言女兒未曾嘗地道風味，今次讓愛女品嘗地道美食。